స్కూళ్లు కూడా ప్రారంభం అయ్యాయి. విద్యాసంస్థల్లో పాటించాల్సిన ఎస్‌ఓపీలను విడుదలచేశాం.


అమరావతి (ప్రజా అమరావతి);


*జిల్లాల కలెక్టర్లు, ఇతర ఉన్నతాధికారులతో స్పందనపై వీడియో కాన్ఫరెన్స్‌ ద్వారా క్యాంప్‌ కార్యాలయం నుంచి సీఎం శ్రీ వైయస్‌.జగన్‌ సమీక్ష.*



*కోవిడ్‌ నియంత్రణ, నివారణ, వ్యాక్సినేషన్, సీజనల్‌ వ్యాధులు, ఉపాధిహామీ పనులు, గ్రామ, వార్డు సచివాలయాలు తనిఖీలు, వైఎస్సార్‌ అర్భన్‌ క్లినిక్స్, ఇళ్ల స్ధలాల పంపిణీ, 90 రోజుల్లోగా ఇంటి స్ధలం కేటాయింపు, ఇళ్ల నిర్మాణంతోపాటు ఖరీప్‌ వ్యవసాయ సీజన్, వైయస్సార్‌ జగనన్న శాశ్వత భూహక్కు మరియు భూరక్ష, పరిశ్రమలపై సీఎం సమీక్ష.* 


*ఈ సందర్భంగా సీఎం శ్రీ వైయస్‌.జగన్‌ ఏమన్నారంటే...:* 


*కోవిడ్‌:*

కలెక్టర్లతో ఎప్పుడు వీడియో కాన్ఫరెన్స్‌ జరిగినా కోవిడ్‌ పై చర్చ లేని రోజు లేదు. పూర్తి స్ధాయిలో వ్యాక్సినేషన్‌ జరిగేంతవరకు వరకు దీనిపై చర్చించాల్సిన అవసరం ఉంది. పాజిటివిటీ రేటు, రికవరీ రేటు ఎలా ఉన్నా దీనిపై నిరంతర పర్యవేక్షణ, సమీక్షచేయాలి.

కోవిడ్‌తో సహజీవనం చేయాల్సిన పరిస్థితి.

సగటున 1300 కేసులకు పడిపోయినప్పటికీ మనం జాగ్రత్తలు తప్పకుండా తీసుకోవాలి. రివకరీ రేటు 98.63 శాతం, వీక్లీ పాజిటివిటీ రేటు 2.07శాతం ఉన్నప్పటికీ మనం అప్రమత్తంగానే ఉండాలి.

కోవిడ్‌ మార్గదర్శకాలను పాటించాలి. మార్గదర్శాలను పాటించకపోతే కఠినంగా వ్యవహరించాలి. మాస్క్‌లు ధరించిడం తప్పనిసరి.  నిబంధనలు ఉల్లంఘించిన దుకాణాలు, ఇతర సముదాయాలకు జరిమాణాలు విధించాలి. పెళ్లిళ్లలో 150కి మించి ఉండకుండా చూడాలి.


*విద్యాసంస్ధలు– ఎస్‌ఓపీ*

స్కూళ్లు కూడా ప్రారంభం అయ్యాయి. విద్యాసంస్థల్లో పాటించాల్సిన ఎస్‌ఓపీలను విడుదలచేశాం.



వాటిని తప్పకుండా పాటించాలి. లక్షణాలున్నవారికి  ఫోకస్‌గా టెస్టింగ్‌ చేయాలి. ఇంటింటికీ సర్వేలు కొనసాగాలి.

ఎవరికి లక్షణాలు ఉన్నా పరీక్షలు చేయాలి. ఎవరికైనా లక్షణాలు ఉన్నాయని టీచర్‌చెప్తే... మార్గదర్శకాల ప్రకారం అక్కడ పరీక్షలు చేయాలి. విద్యార్థులకే కాదు, వారి తల్లిదండ్రులకు కూడా వెంటనే పరీక్షలు చేయాలి.


*104 సమర్ధ నిర్వహణ*

104 అనే నంబరు ఒన్‌స్టాప్‌ సొల్యూషన్‌ కావాలి. ఇది చాలా సమర్థవంతంగా పనిచేయాలి. నిరంతరం పర్యవేక్షణ చేయాలి.

నిర్దేశించుకున్న ఎస్‌ఓపీలను పాటించాలి.

ఎవరైనా ఫోన్‌చేసినప్పుడు నిర్దేశించుకున్న ప్రోటోకాల్స్‌ పాటించాలి.

కోవిడ్‌తగ్గింది కాబట్టి, పట్టించుకోకుండా ఉండే పరిస్థితి ఉండకూడదు.

మనం నిరంతరం ఫోకస్‌గా ఉండాలి.


*ధర్డ్‌ వేవ్‌ సన్నద్ధత*

థర్డ్‌ వేవ్‌వస్తుందో, లేదో తెలియదు కానీ  మనం సన్నద్ధంగా ఉండాలి. కార్యాచరణ ప్రకారం ముందుకు సాగాలి. ఆస్పత్రులను, సిబ్బందిని సన్నద్ధంగా ఉంచుకోవాలి. నర్సులకు శిక్షణ కూడా ఇవ్వాలి.

అందుబాటులో వైద్యులను, బెడ్లను, ఆస్పత్రులను ఉంచుకోవాలి. ప్రతి ప్రభుత్వ ఆస్పత్రిలో పీఎస్‌ఏ ప్లాంట్లు అందుబాటులోకి వస్తున్నాయి.

ఆక్సిజన్‌ సిలెండర్లు, కాన్‌సంట్రేటర్లు అందుబాటులో ఉంచుకోవాలి. 

100  బెడ్లు దాటిన ప్రై వేటు ఆస్పత్రుల్లో కూడా పీఎస్‌ఏ ప్లాంట్లను ఏర్పాటు చేసుకోవాలి. దీనిపైనా మానిటరింగ్‌ చేయాలి.


*వ్యాక్సినేషన్‌*

ఇప్పటివరకూ 1,90,93,476 మందికి వ్యాక్సినేషన్‌ ఇచ్చాం.   72,18,532 మందికి డబుల్‌ డోస్, 1,18,74,944 మందికి సింగిల్‌డోస్‌ వ్యాక్సిన్లు ఇచ్చాం.

80 శాతం ప్రజలకు డబుల్‌డోస్‌ ఇచ్చేంతవరకూ కూడా అప్రమత్తంగా ఉండాలి. ఇది చాలా ముఖ్యమైన అంశం. వ్యాక్సినేషన్‌ పై దృష్టి సారించాలి. 45 సంవత్సరాలు దాటిన కేటగిరీలో మనం 90 శాతానికిపైగా వ్యాక్సినేషన్‌ పూర్తి చేశాం. 

ప్రస్తుతం 18 నుంచి 44 సంవత్సరాల మధ్య ఉన్నవారికి వ్యాక్సిన్లపై దృష్టి పెట్టాలి. సచివాలయాన్ని యూనిట్‌గా పెట్టుకుని ప్రతి ఇంటిలో ఉన్నవారికీ వ్యాక్సిన్లు పూర్తిచేసేలా ముందడుగు వేయండి.  ఫలితంగా  ప్రతి ఒక్కరూ వ్యాక్సిన్‌ తీసుకునే అవకాశం ఉంటుంది. 

దీనివల్ల వ్యాక్సిన్ల వృథాను అరికట్టగలుగుతాం.


*సీజనల్‌ వ్యాధులు– అప్రమత్తం*

అదే సమయంలో ఇతర సీజనల్‌ వ్యాధులపై అప్రమత్తంగా ఉండండి. వర్షాకాల సమావేశాల్లో వచ్చే వ్యాధులపట్ల అప్రమత్తంగా ఉండాలి.

మలేరియా, టైఫాయిడ్, డెంగ్యూ, చికెన్‌గున్యా తదితర వ్యాధుల పట్ల అప్రమత్తంగా ఉండాలి. అన్నిరకాల చర్యలు తీసుకోండి. శానిటేషన్‌పైన కూడా శ్రద్ధ పెట్టండి. తాగునీటి నాణ్యతపైనా కచ్చితంగా ధ్యాస పెట్టండి. 15 రోజులకొకసారి వీటిపై సమీక్ష నిర్వహించాలి. 


*ఉపాధి హామీ పనులు*

గత ప్రభుత్వం బకాయి పెట్టిన ఎన్‌ఆర్‌ఈజీఎస్‌ డబ్బును మన ప్రభుత్వం చెల్లించాల్సి వస్తోంది.

కేంద్రం నుంచి కూడా మనకు నిధులు రావాల్సి ఉంది.

ఎన్‌ఆర్‌జీఎస్‌ పనులపై పూర్తిగా దృష్టి పెట్టండి.

గ్రామం రూపు రేఖలు పూర్తిగా మార్చబోయే వ్యవస్ధను మనం క్రియట్‌ చేస్తున్నాం. గ్రామంలోకి అడుగుపెట్టిన వెంటనే ఓ రకమైన సంతృప్తి కలుగుతుంది. 

 గ్రామంలోకి అడుగుపెట్టిన వెంటనే గ్రామ సచివాలయం, ప్రతి 50 ఇళ్లకు ఒక్కరు చొప్పున సేవలందించే వలంటీర్లు, ఇంగ్లిషు మీడియం స్కూలు, మరో నాలుగు అడుగులు వేస్తే కనిపించే వైయస్సార్‌ విలేజీ క్లినిక్, ఆర్బీకే, మరో నాలుగడుగులు వేస్తే డిజిటల్‌ లైబ్రరీ, ఇంగ్లిషు మీడియం పౌండేషన్‌ స్కూల్‌ వీటితో పాటు ఏఎంసీయూ, బీఎంసీయూలు ఇవన్నీ గ్రామం యొక్క స్వరూపాన్ని పూర్తిగా మార్చివేసే కార్యక్రమాలు. 


*గ్రామ సచివాలయాలు, విలేజీ క్లినిక్స్, ఏఎంసీయూ,బీఎంసీయూల నిర్మాణం*

గ్రామ సచివాలయాల నిర్మాణాలకు సంబంధించి అక్టోబరు 2 నాటికి 75 శాతం భవనాలు పూర్తి చేసేలా ధ్యాస పెట్టండి. అప్పటికి పూర్తి చేయగలిగితే మంచి పాజిటివ్‌ మెసేజ్‌ను చేయగలుగుతాం. మరింత ధ్యాస పెట్టాలి.


*ఆర్బీకేలు*

10,408 ఆర్బీకేల నిర్మాణంపై మరింత చురుగ్గా పనిచేయాలి. వీటిని డిసెంబరు 31 కల్లా పూర్తి చేయాలి. తూర్పు గోదావరి, కర్నూలు, నెల్లూరు జిల్లాల్లో మరింత ధ్యాస పెట్టాలి. 

*వైయస్సార్‌ హెల్త్‌ క్లినిక్స్‌* 

మొత్తం 8585 హెల్త్‌ క్లినిక్స్‌ నిర్మిస్తున్నాం. వీటి పైనా కూడా ధ్యాస పెట్టి,  డిసెంబరు 31 నాటికి పూర్తి చేయాలి. భవనాల నిర్మాణంపై కర్నూలు, విజయనగరం, శ్రీకాకుళం జిల్లాలు ధ్యాసపెట్టి డిసెంబరు నాటికి పూర్తి చేయాలి.


*ఏఎంసీయూలు, బీఎంసీయూలు*

తొలిదశలో 2541 భవనాల నిర్మాణం లక్ష్యంగా పెట్టుకున్నాం. పనులు పురోగతిలో ఉన్న భవనాలు 2253. ఇంకా తూర్పుగోదావరి కృష్ణ, విజయనగరం జిల్లాల్లో పనులు గ్రౌండింగ్‌ చేయాలి. 31 డిసెంబరు నాటికి ఇవి కూడా పూర్తి కావాలి. అమూల్‌ ఆధ్వర్యంలో సేకరణ జరుగుతున్న ప్రాంతాల్లో పాలరేటు రూ.5 నుంచి రూ.15 వరకు పెరుగుదల వస్తుంది. ఇది అమూల్, బీఎంసీయూల వల్ల సాధ్యమవుతుంది. 


*డిజిటల్‌ లైబ్రరీలు*

ఫేజ్‌ 1లో మొత్తం డిజిటల్‌ లైబ్రరీలు నిర్మాణ లక్ష్యం 4530. శాంక్షన్‌ అయిన డిజిటల్‌ లైబ్రరీలు 4150 కాగా... పనులు పురోగతిలో ఉన్నవి 1106. ఇంకా 380 గ్రామాల్లో పనులు మొదలు కాలేదు. 

31 ఆగష్టు నాటికి కచ్చితంగా నిర్మాణ పనులు మొదలుపెట్టాలి. 31 డిసెంబరు నాటికి నిర్మాణ పనులు పూర్తి కావాలి. దీనివల్ల వర్క్‌ఫ్రమ్‌ హోం కాన్సెప్ట్‌ను అమలు చేయగలుగుతాం. 

చెట్లు నాటే కార్యక్రమంపై కూడా దృష్టి పెట్టాలి, నాటడమే కాకుండా అవి సరిగా పెరిగే ఏర్పాటు కూడా చేయాలి.


*గ్రామ, వార్డు సచివాలయాలు– తనిఖీలు*

కలెక్టర్లు జాయంట్‌ కలెక్టర్లు, మున్సిపల్‌ కమిషనర్లు, ఐటీడీఏ పీఓలు, సబ్‌కలెక్టర్లు అందరినీ గ్రామ, వార్డు సచివాలయాల్లో ఇన్‌స్పెక్షన్లు చేయమని చెప్పాం.అందరూ తనిఖీల విషయంలో మంచి పురోగతి చూపారు. తనిఖీలు చేసేటప్పుడు ఎలాంటి ప్రోటోకాల్‌ పాటించాలో చెప్పాం. తనిఖీలు చేసిన తర్వాత సచివాలయాల సమర్థత మరింత పెరగాలి. ప్రజలకు మరింత మెరుగ్గా సేవలు అందించాలి.


వివిధ డిపార్టుమెంట్ల పోస్టర్లు, వెల్ఫేర్‌ క్యాలెండర్లు, బయెమోట్రిక్‌ అటెండెంటెన్స్, రిజిస్టర్లు, రికార్డుల నిర్వహణతోపాటు సచివాలయాల సిబ్బంది, వాలంటీర్ల పనితీరును కూడా పర్యవేక్షణ చేయాలి. 

వారికి అవగాహన కల్పించాలి. కౌన్సెలింగ్‌ చేయాలి. గ్రీవెన్స్‌ నంబర్‌ను డిస్‌ప్లే చేస్తున్నారో, లేదో చూడాలి. 


అలాగే తిరస్కరించిన అర్జీలను ఏ ప్రాతిపదికిన తిరస్కరించారో చూడాలి. ఒక అర్జీని తిరస్కరించినప్పుడు, దరఖాస్తుదారుడు మరలా దరఖాస్తు చేస్తే అది జేసికి వెళ్లాలి, దీనిపై ఆ అధికారి పరిశీలన చేయాలి. ఇది చాలా ముఖ్యమైన అంశం. 


*నిర్దేశిత సమయంలో మంజూరు*

పెన్షన్, రైస్‌కార్డు, ఆరోగ్యశ్రీకార్డు 21 రోజుల్లో దరఖాస్తుదారుని అర్హతను నిర్ధారించాలి. అర్హత సాధించిన వారికి 90 రోజుల్లోగా వాటిని మంజూరు చేయాలి. సంవత్సరానికి 4 సార్లు ఇలా శాంక్షన్లు వస్తాయి.


*పధకాల అమలు– మరింత పారదర్శకత*

రాష్ట్ర ప్రభుత్వం ప్రతి నెలా పథకాలను అమలు చేస్తోంది. ఇళ్లపట్టాలతోపాటు, నేతన్న నేస్తం, చేయూత, మత్స్యకార భరోసా తదితర పథకాలను అమలు చేస్తోంది. పథకాన్ని అమలు చేసినప్పుడు ఎవరైనా మిగిలిపోతే వారిని దరఖాస్తు చేసుకోమని చెప్తున్నాం. ఈ జాబితాల్లో కూడా 90 రోజుల్లోగా అర్హతలను నిర్ధారించి, అర్హులైన వారికి 6 నెలల్లోగా శాంక్షన్లు ఇవ్వాలి.

దీనివల్ల ప్రజలకు వ్యవస్థలపై విశ్వాసం కలుగుతుంది.

సంవత్సరానికి ఇలా 2 సార్లు శాంక్షన్లు వస్తాయి.


*సిటిజన్‌ అవుట్‌ రీచ్‌...*

అధికారుల తనిఖీల్లో ఈ అంశాలను పరిగణలోకి తీసుకోవాలి. సిటిజన్‌ అవుట్‌రీచ్‌ కార్యక్రమంపైనా కూడా అధికారులు తనిఖీల్లో పర్యవేక్షణ చేయాలి.

సచివాలయాల పరిధిలో పథకాల పట్ల అవగాహన కల్పించాలి. గ్రామ, వార్డు సచివాలయాల సిబ్బంది లబ్ధిదారులతో అవగాహన కార్యక్రమం నిర్వహించాలి. పథకం అమలుకు ఒకరోజు ముందు ఈ సమావేశం జరగాలి. లబ్ధిదారులకు పథకం ప్రయోజనాలు చేరిన తర్వాత వలంటీర్‌తో కలిసి వెల్ఫేర్‌ అసిస్టెంట్‌ లబ్ధిదారుని వద్దకు వెళ్లి డిజిటల్‌ అక్నాలెడ్జ్‌మెంట్‌తోపాటు, భౌతికంగా రశీదు కూడా ఇవ్వాలి.


*వలంటీర్ల బృందం– సంక్షేమ పథకాల పై అవగాహన*

నెలలో చివరి శుక్రవారం, శనివారం గ్రామ, వార్డు సచివాలయాల సిబ్బందితో ఒక్కొక్కరు, ఇద్దరు ముగ్గురు వాలంటీర్లతో కలిపి  బృందంగా ఏర్పడి ఇంటింటికీ వెళ్లి  ప్రభుత్వ పథకాలను వివరించాలి.

వాటిపట్ల అవగాహన కల్పించాలి. పౌరులనుంచి వచ్చే ఫీడ్‌బ్యాక్‌ను తీసుకోవాలి. గ్రామ, వార్డు సచివాలయాల సిబ్బంది ఫోన్‌నంబర్లను వారికి ఇవ్వాలి. కరపత్రాలను కూడా ఇవ్వాలి.


*వైయస్సార్‌ అర్భన్‌ క్లినిక్స్‌*

మొత్తం 125 మున్సిపాల్టీలలో 528 అర్భన్‌ క్లినిక్స్‌ నిర్మిస్తున్నాం. వీటి నిర్మాణంపై మరింత దృష్టి సారించాలి. 


*ఇళ్ల స్ధలాల పంపిణీ, ఇళ్ల నిర్మాణం, 90 రోజుల్లో ఇంటి స్ధలం*

హౌసింగ్‌ లే అవుట్లలో లబ్ధిదారులతో ప్లాట్ల మ్యాపింగ్‌ 10 రోజుల్లోగా పూర్తిచేయాలి. దీని వల్ల అర్హులైన వారికి మిగిలిన ప్లాట్లను వెంటనే కేటాయించేందుకు అవకాశం ఉంటుంది. అలాగే కొత్తగా దరఖాస్తులు స్వీకరించి అర్హులుగా గుర్తించిన వారికీ ఇంటిపట్టాలు ఇచ్చేలా చర్యలు తీసుకోవాలి. 

పెండింగులో ఉన్న సుమారు 8వేల దరఖాస్తులకు వెంటనే వెరిఫికేషన్‌ పూర్తిచేయాలి. 

అర్హులుగా గుర్తించిన 1,99,663 లబ్ధిదారులకు ప్రస్తుతం ఉన్న లే అవుట్ల ద్వారా 45,212 మందికి పట్టాలు ఇవ్వబోతున్నాం. 

కొత్తగా లే అవుట్లలో 10,801 మందికి పట్టాలు, మొత్తం 56వేల మంది మందికి ప్రస్తుతం ఉన్న లే అవుట్ల ద్వారా పట్టాలు అందనున్నాయి. 

మరో 1,43,650 మందికి ఇళ్లపట్టాలు ఇచ్చేలా చర్యలు తీసుకోవాలి. 


*ఇళ్ల నిర్మాణంపై నిరంతర పర్యవేక్షణ*

మనం 15.60 లక్షల ఇళ్లు నిర్మించబోతున్నాం. 

వీటిలో ఇప్పటివరకూ  10.11 లక్షల ఇళ్ల  గ్రౌండింగ్ అయ్యాయి. ఈ ఇళ్ల నిర్మాణ ప్రగతిని ఎప్పటికప్పుడు పరిశీలించాలి. ప్రతి ఇంటి నిర్మాణ ప్రగతిపై ఆన్‌లైన్‌ స్టేజ్‌ అప్‌డేషన్‌ చేయాలి. కలెక్టర్లు హౌసింగ్‌పై ప్రత్యేక దృష్టిపెట్టాలి.


*అక్టోబరు 25 నుంచి ఆప్షన్‌ 3 ఇళ్ల నిర్మాణం* 

అక్టోబరు 25 నుంచి ఆప్షన్‌ 3 ఎంపిక చేసుకున్న ఇళ్ల నిర్మాణం. ఆప్షన్‌ 3 ఎంపిక చేసుకున్న లబ్ధిదారుల ఇళ్లు 3.25 లక్షలు. ఇప్పటికే 1.77 లక్షల ఇళ్లకు సంబంధించి 12,855 గ్రూపులు ఏర్పాటు అయ్యాయి.  

ఒక్కో గ్రూపు హెడ్‌మేసిన్, 20 మంది లబ్ధిదారులుతో ఏర్పాటైంది. మిగిలిన చోట్ల గ్రూపుల ఏర్పాటుపై దృష్టిపెట్టాలి. అక్టోబరు 25లోగా అన్నిరకాల సన్నాహకాలు పూర్తికావాలి. నీరు, కరెంటు సదుపాయాలను సెప్టెంబరు 15లోగా ఏర్పాటు చేయాలి. దీనిపై కలెక్టర్లు ప్రత్యేక దృష్టి పెట్టాలి. 


*ఇళ్ల నిర్మాణం– లబ్ధిదారులకు రుణాలు*

లబ్ధిదారులకు పావలా వడ్డీ కింద రుణాలు ఇచ్చేందుకు బ్యాంకర్లతో కలెక్టర్లు మాట్లాడాలి. మనం లబ్ధిదారులకు పట్టాలు ఇచ్చి, రిజిస్ట్రేషన్‌ చేశాం. అత్యవసర సమయాల్లో వీటిమీద రుణం తెచ్చుకునేలా చేశాం. పావలా వడ్డీ మాత్రమే లబ్ధిదారునికి పడుతుంది, మిగతా వడ్డీని ప్రభుత్వం చెల్లిస్తుంది. రుణసదుపాయం వల్ల ఇళ్ల నిర్మాణ కార్యక్రమం మరింత ఊపందుకుంటుంది.

కొన్ని జిల్లాల్లో సెర్ప్, మెప్మా లాంటివాటి సహకారంతో లబ్ధిదారులకు పావలావడ్డీ కింద రుణాలు ఇస్తున్నారు.


*ధరల నియంత్రణలో  కలెక్టర్లు..*

కొన్ని జిల్లాల్లో మెటల్‌ ధరలను అనూహ్యంగా పెంచారన్న సమాచారం వస్తోంది. కలెక్టర్లు దీనిపై చర్యలు తీసుకోవాలి. వెంటనే రేట్లు నిర్ణయించాలి. ధరలు పెంచేవారిపై కఠిన చర్యలు తీసుకుంటామని హెచ్చరికలు పంపాలి.

లే అవుట్ల సమీపంలోనే ఇటుక తయారీ యూనిట్‌ను ఏర్పాటు చేసేలా ప్రోత్సహించాలి. దీనివల్ల రవాణాఖర్చు తగ్గుతుంది.

ప్రతి వారానికి ఒక సారి కలెక్టర్లు ఇళ్ల నిర్మాణ ప్రగతిపై సమీక్ష చేయాలి. అప్పుడే ఇంత పెద్ద కార్యక్రమాన్ని విజయవంతంగా ముందుకు తీసుకెళ్లగలుగుతాం. 


*ఖరీఫ్‌ సీజన్‌*

రాష్ట్ర వ్యాప్తంగా కొన్ని మండలాలు మినహా సాధారణ వర్షపాతం నమోదైంది. 

ఖరీఫ్‌కింద సాగు లక్ష్యం 92.21 లక్షల ఎకరాలు కాగా,  ఇప్పటివరకూ 59.07 లక్షల ఎకరాలు సాగు మొదలైంది. ఇందులో 37.25 లక్షల ఎకరాల్లో ఇ–క్రాపింగ్‌  పూర్తైంది. 

 

*ఇ–క్రాపింగ్‌ పై మరింత దృష్టి*

మిగిలిన చోట్ల కూడా ఇ–క్రాపింగ్‌ చేసేలా చర్యలు తీసుకోవాలి. దీనిపై కలెక్టర్లు మరింత దృష్టి పెట్టాలి. 

కలెక్టర్లు, జాయింట్‌ కలెక్టర్లు 10శాతం ఇ– క్రాపింగ్‌ను తనిఖీ చేయాలి. జేడీఏలు, డీడీఏలు 20శాతం ఇ– క్రాపింగ్‌ను తనిఖీచేయాలి. అగ్రికల్చర్, హార్టికల్చర్‌ అధికారులు 30శాతం ఇ– క్రాపింగ్‌చేయాలి.

ఇ– క్రాపింగ్‌ అనేది నిరంతర ప్రక్రియ.

సీజన్‌తో సంబంధం లేకుండా ఇ– క్రాపింగ్‌ జరగాలి. ఎలాంటి డాక్యుమెంట్లను రైతులనుంచి డిమాండ్‌ చేయరాదు. రైతులకు క్రాప్‌ ఇన్యూరెన్స్, ఇన్‌పుట్‌ సబ్సిడీ, పంట సేకరణ, పంట రుణాలు, విత్తనాలు, ఎరువులు సరఫరా ఇలా అన్నింటికీ ఇ–క్రాపింగ్‌ చాలా కీలకం. అందుకే  ఇ– క్రాపింగ్‌పైన కలెక్టర్లు ప్రత్యేక దృష్టి పెట్టాలి.


*వ్యవసాయ సలహా మండళ్లు*

వ్యవసాయ సలహామండళ్ల సమావేశాలు కొనసాగాలి.

ఈ సమావేశాలను  కలెక్టర్లు సమీక్షించాలి, పర్యవేక్షణ చేయాలి. ఈ సమావేశాల్లో ప్రస్తావనకు వచ్చే సమస్యల పరిష్కారంపై కలెక్టర్లు దృష్టిపెట్టాలి.

నెలలో మొదటి శుక్రవారం ఆర్బీకేల్లో, రెండో శుక్రవారం మండల స్థాయిల్లో, ప్రతి 3వ శుక్రవారం జిల్లాల స్థాయిలో అగ్రికల్చర్‌ అడ్వయిజరీ సమావేశాలు జరగాలి. జిల్లాస్థాయి సమావేశాలకు కలెక్టర్‌ హాజరు కావాలి.


*కల్తీ పై కొరడా...*

ఆర్బీకేల నుంచి విత్తనాలు, ఎరువుల తదితర వాటి పంపిణీ, వాటి నాణ్యతలపై కలెక్టర్లు దృష్టిపెట్టాలి. ఎక్కడా కల్తీలకు చోటు ఉండకూడదు. ప్రైవేటు దుకాణాల్లో క్రమం తప్పకుండా తనిఖీలు చేయాలి. కలెక్టర్లు, ఎస్పీలు దీనిపై ప్రతివారం కూర్చుని చర్చించాలి. 

ఆర్బీకేల్లో బ్యాంకింగ్‌ కరస్పాండెంట్లు అందుబాటులో ఉండేలా చూడాలి. రైతులకు రుణాలతో పాటు ఇతర బ్యాంకింగ్‌  సేవలు అప్పుడే సక్రమంగా అందించగలుగుతాం. 


*వైయస్సార్‌ జగనన్న శాశ్వత భూ హక్కు మరియు భూ రక్ష*

జగనన్న శాశ్వత భూ హక్కు మరియూ  భూరక్ష చాలా ప్రతిష్టాత్మకమైన కార్యక్రమం. 

100 ఏళ్ల తర్వాత సర్వే చేస్తున్నాం. కలెక్టర్ల పేర్లు చరిత్రలో నిలిచిపోతాయి. సర్వేను కలెక్టర్లు సీరియస్‌గా తీసుకోవాలి. 

భూ వివాదాల్లేని రాష్ట్రం దిశగా ఏపీలో సర్వే నిర్వహిస్తున్నాం.

దీనిపై మరింత ధ్యాస పెట్టాలి. 

 

*పరిశ్రమలు– ప్రోత్సహకాలు*

ఎంఎస్‌ఎంఈలకు సెప్టెంబరు 3న ప్రోత్సాహకాలు విడుదల చేయబోతున్నాం. కలెక్టర్లు నెలలో ఒకరోజు ఎంఎస్‌ఎంఈలకు  మరో రోజు ఇతర పరిశ్రమలకు కేటాయించాలి. వారితో మాట్లాడి సమస్యల ఏంటో తెలుసుకోవాలి. వాటిని పరిష్కరించడంపై దృష్టి పెట్టాలి. అప్పుడే పారిశ్రామిక రంగం ప్రగతి సాధిస్తుంది.

జిల్లాస్థాయిల్లో కలెక్టర్‌ ఛైర్మన్‌గా ఉన్న ఇండస్ట్రియల్‌ అండ్‌ ఎక్స్‌పోర్ట్‌ ప్రమోషన్‌ కమిటీ  కూడా  ప్రతినెలలో ఒకరోజు సమావేశం కావాలి.

దీనివల్ల ఎప్పటికప్పుడు వారికి పోత్సాహకాలు విడుదలకు మార్గం ఉంటుంది. భూముల కేటాయింపులు, కాలుష్యనివారణా.... తదితర అంశాలపై దృష్టి పెట్టడానికి అవకాశం ఉంటుంది.


*75శాతం స్ధానికులకే...*

పరిశ్రమల్లో 75శాతం ఉద్యోగాలు స్థానికులకే చట్టం అమలుపైనా సమీక్షించాలి. పరిశ్రమలకిచ్చే రాయితీలకు ఈ చట్టంతో సంబంధం ఉంది. 75 శాతం స్ధానికులకు రిజర్వేషన్లు ఇవ్వకపోతే రాయితీలకు అర్హత ఉండదు.  నైపుణ్యాభివృద్ధి కేంద్రాలపైనా దృష్టి  పెట్టాలి. ప్రతి పార్లమెంటులో ఒక కాలేజీని తీసుకువస్తున్నాం. విజయదశమి రోజున వీటి నిర్మాణాలు ప్రారంభిస్తున్నాం.

ఈ చర్యలపై కలెక్టర్లు దృష్టి పెట్టడంద్వారా పెట్టుబడి పెట్టేవారిలో విశ్వాసం నింపుతాం. గత ప్రభుత్వ ఐదేళ్ల కాలంలో వేల కోట్ల రూపాయలు ఇండస్ట్రియల్‌ ఇన్సెంటివ్స్‌ పెండింగ్‌లో పెట్టారు. మనం అధికారంలోకి వచ్చిన తర్వాత నిర్ధిష్టమైన తేదీ ప్రకటించి ఇండస్ట్రియల్‌ ఇన్సెంటివ్‌ ఎరియర్స్‌ ఇస్తున్నాం. ఎంఎస్‌ఎంఈ, స్పిన్సింగ్, ఇతర పరిశ్రమలకు కరెంటుపై రిబేట్‌తో పాటు అన్ని రకాల ప్రోత్సహకాలు అందిస్తున్నాం. పరిశ్రమలకు అనుకూలమైన వాతావరణం కల్పిస్తున్నాం. అప్పుడే పరిశ్రమలు వస్తాయి, యువతకు ఉద్యోగాలు లభిస్తాయి. నెలకు మూడు రోజులు వీరికి కలెక్టర్లు కేటాయిస్తే... పారిశ్రామిక వేత్తలకు నమ్మకం కలిగి ముందుకు వస్తారు.


*విలేజీ క్లినిక్స్‌ నుంచి బోధనాసుపత్రుల వరకూ...*

విలేజ్‌ క్లినిక్స్, పీహెచ్‌సీలు, సీహెచ్‌సీలు, ఏరియా ఆస్పత్రులు, జిల్లా ఆస్పత్రులు, టీచింగ్‌ఆస్పత్రుల్లో ఉండాల్సిన సిబ్బంది ఎంత? ఎంతమంది ఉన్నారు?

దీనిపై 90 రోజుల్లోగా వివరాలు ఖరారు చేయాలి. ఎంతమంది సిబ్బంది అవసరమో నిర్ధారించాలి.

ఈమేరకు నియమాకాలు పూర్తికావాలి. గిరిజన ప్రాంతాల్లో ఉన్నవారికి ఇన్సెంటివ్‌లు ఇవ్వాలి. డిప్యుటేషన్లు ఇవ్వొద్దు. కచ్చితంగా డాక్టర్లు, సిబ్బంది అందుబాటులో ఉండేలా చర్యలు తీసుకోవాలి. 

ఎలాంటి పరిస్థితినైనా ఎదుర్కోనేలా, చికిత్స అందించే స్థాయికి ప్రభుత్వ ఆస్పత్రులను తీసుకెళ్లాలి. నాడు–నేడు ద్వారా ఆస్పత్రులను జాతీయ ప్రమాణాల స్ధాయిలో నిర్మిస్తున్నాం. దీనికి అవసరమైన సిబ్బందిని కూడా నియమించాలి. కలెక్టర్లు ఈ టాస్క్‌ పూర్తి చేయాలి అని సీఎం శ్రీ వైయస్‌.జగన్ నిర్దేశించారు.


ఈ కార్యక్రమంలో ఉపముఖ్యమంత్రి (వైద్య,ఆరోగ్యం) ఆళ్ల కాళీ కృష్ణ శ్రీనివాస్‌ (నాని), పంచాయతీరాజ్, గ్రామీణాభివృద్ధిశాఖ మంత్రి పెద్దిరెడ్డి రామచంద్రారెడ్డి, పురపాలక, పట్టణాభివృద్ధిశాఖ మంత్రి బొత్స సత్యనారాయణ, సీఎస్‌ ఆదిత్యనాథ్‌దాస్, అడిషనల్‌ డీజీపీ ఏ రవిశంకర్‌, ల్యాండ్‌ అడ్మినిస్ట్రేషన్‌ చీఫ్‌ కమిషనర్‌ నీరబ్‌ కుమార్‌ ప్రసాద్, గృహనిర్మాణశాఖ స్పెషల్‌ సీఎస్‌ అజయ్‌జైన్, వైద్య ఆరోగ్య శాఖ ముఖ్య కార్యదర్శి అనిల్‌ కుమార్‌ సింఘాల్, పంచాయతీరాజ్, గ్రామీణాభివృద్ధిశాఖ ముఖ్య కార్యదర్శి గోపాలకృష్ట ద్వివేది,  వ్యవసాయశాఖ కమిషనర్‌ హెచ్‌ అరుణ్‌ కుమార్, ఏపీ టిడ్కో ఎండీ సిహెచ్‌ శ్రీధర్, ఇతర ఉన్నతాధికారులు హాజరయ్యారు.