తిరుమల శ్రీవారి ఆలయంలో వైభ‌వంగా ఉగాది ఆస్థానం

 తిరుమల శ్రీవారి ఆలయంలో వైభ‌వంగా ఉగాది ఆస్థానం


తిరుమల,  ఏప్రిల్ 02 (ప్రజా అమరావతి): తిరుమల శ్రీవారి ఆలయంలో శ‌నివారం శ్రీ శుభ‌కృత్‌నామ సంవత్సర ఉగాది ఆస్థానం వైభ‌వంగా జరిగింది.

ఈ సందర్భంగా ఉదయం సుప్రభాతం అనంతరం శుద్థి నిర్వహించారు. ఆ తరువాత శ్రీదేవి భూదేవి సమేత శ్రీ మలయప్పస్వామివారికి, విష్వక్సేనుల వారికి విశేష సమర్పణ చేశారు. విమాన ప్రాకారం, ధ్వజస్తంభం చుట్టూ ఊరేగింపుగా ఆలయంలోనికి ప్రవేశించారు. ఆ తరువాత శ్రీవారి మూలవిరాట్టుకు మరియు ఉత్స‌వ‌మూర్తులకు నూతన వస్త్రాలను ధరింపచేశారు. అనంతరం పంచాంగ శ్రవణం జరిగింది. బంగారు వాకిలి వ‌ద్ద‌ ఆగమ పండితులు, అర్చకులు శాస్త్రోక్తంగా ఉగాది ఆస్థానం నిర్వహించారు.

అనంత‌రం టిటిడి ఛైర్మ‌న్ శ్రీ వై.వి.సుబ్బారెడ్డి మీడియాతో మాట్లాడుతూ దేశ, విదేశాల‌లో ఉండే తెలుగు ప్ర‌జ‌ల‌కు నూత‌న శ్రీ శుభ‌కృత్‌నామ సంవ‌త్స‌ర శుభాకాంక్ష‌లు తెలియ‌జేశారు. శ్రీ‌వారి ఆనుగ్ర‌హంతో క‌రోనా మ‌హ‌మ్మారి నుండి బ‌య‌ట‌ప‌డి దేశ వ్యాప్తంగా సాధార‌ణ ప‌రిస్థితులు నెల‌కొంటున్నాయ‌ని చెప్పారు. రాబోవు రోజుల్లో ఇలాంటి ప్ర‌మాదాలు లేకుండా లోకంలోని మాన‌వాళిని కాపాడాల‌ని శ్రీ‌వారిని ప్రార్థించిన‌ట్లు తెలిపారు. ఈ నూత‌న సంవ‌త్స‌రంలో ప్ర‌జ‌లంద‌రు ఆయురారోగ్యాల‌తో, సుఖ‌సంతోషాల‌తో, సిరిసంప‌ద‌ల‌తో ఉండాల‌ని ఆకాంక్షించారు.

ఈ కార్య‌క్ర‌మంలో రాష్ట్ర రవాణా శాఖ మంత్రి గౌ.శ్రీ పెర్నివెంక‌ట‌రామ‌య్య, అద‌న‌పు ఈవో శ్రీ ఏ.వి.ధ‌ర్మారెడ్డి దంప‌తులు, బోర్డు స‌భ్యులు శ్రీ రాములు, శ్రీ మారుతి ప్ర‌సాద్‌, శ్రీ కృష్ణారావు, శ్రీ నంద‌కుమార్‌, జెఈవో శ్రీ‌మ‌తి స‌దా భార్గ‌వి, సివిఎస్వో శ్రీ గోపినాథ్ జెట్టి, ఆల‌య డెప్యూటీ ఈవో శ్రీ ర‌మేష్‌బాబు, విజివో శ్రీ బాలిరెడ్డి, ఆలయ పేష్కర్ శ్రీ శ్రీ‌హ‌రి, ఇత‌ర అధికారులు పాల్గొన్నారు.