రెండో దశ జగనన్న తోడు పథకాన్ని క్యాంప్‌ కార్యాలయం నుంచి వర్చువల్‌గా ప్రారంభించిన సందర్భంగా వీడియో కాన్ఫరెన్స్‌ ద్వారా సీఎం శ్రీ వైఎస్‌ జగన్‌తో మాట్లాడిన లబ్దిదారులు*

అమరావతి (ప్రజా అమరావతి);

*రెండో దశ జగనన్న తోడు పథకాన్ని క్యాంప్‌ కార్యాలయం నుంచి వర్చువల్‌గా ప్రారంభించిన సందర్భంగా వీడియో కాన్ఫరెన్స్‌ ద్వారా సీఎం శ్రీ వైఎస్‌ జగన్‌తో మాట్లాడిన లబ్దిదారులు*

*సరస్వతి, లబ్దిదారు, కిర్లంపూడి, తూర్పుగోదావరి జిల్లా*

అన్నా మీరు వచ్చిన తర్వాత అందరినీ ఆదుకున్నారు, మీరు వచ్చిన తర్వాత మా చిరువ్యాపారులను కూడా ఆదుకుంటున్నారు. నేను చిరువ్యాపారాన్ని నడుపుకుంటున్నాను అన్నా, కరోనా కష్టకాలంలో మాకు వడ్డీలేని రుణాన్ని ఇవ్వడం మాకు ఆనందంగా ఉంది, మాకు ఎంతో ఉపయోగకరంగా ఉంది, బయట వడ్డీలు కట్టలేక వ్యాపారాలు మానేద్దామనుకున్నాం, కానీ మీరు మాకు అండగా నిలిచారు. మీరు వచ్చిన తర్వాత అనేక పథకాలు మా కుటుంబానికి అందాయి. వైఎస్‌ఆర్‌ ఆసరా ద్వారా మాకు డబ్బులు అందాయి, నాకు ఇద్దరమ్మాయిలు, ఇద్దరూ ప్రభుత్వ పాఠశాలలో చదువుతున్నారు, మా పిల్లలు కూడా ఇంగ్లీష్‌ మీడియంలో చదువుతూ మా జగన్‌ మామయ్య అన్నీ ఇచ్చారని సంతోషంగా చెబుతున్నారు. మేం బ్యాంకు నుంచి రుణం తీసుకుని పాడిగేదెలు కొనుక్కున్నాం, మా మామయ్య గారికి ఒకటో తేదీనే పెన్షన్‌ ఇస్తున్నారు, మా కుటుంబం అంతా సంతోషంగా ఉంది, మీరు వేసిన బాట వల్లే మేం ఎవరి దగ్గరా చేయి చాపకుండా స్వతంత్రంగా జీవించగలుగుతున్నాం, మా కుటుంబాలను పూర్తిగా ఆదుకున్నారు, మీరు వేసే ప్రతీ అడుగులోనూ మేం మీ వెంటే ఉంటామన్నా అని ముగిస్తున్న సమయంలో అమ్మ ఒడి వచ్చిందా అని సీఎం స్వయంగా అడిగారు, తనకు రెండేళ్ళుగా వచ్చిందని ఆమె సంతోషంగా చెప్పారు.

*జ్యోతి, చిరు వ్యాపారి, భవానీ నగర్‌ గ్రామం, ఎస్‌.కోట మండలం, విజయనగరం జిల్లా*

మీ పాదయాత్రలో నేను కూడా పాల్గొన్నా అన్నా, మీరు చెప్పిన హమీలు అన్నీ అమలుచేస్తున్నారు. నేను కాయగూరల వ్యాపారం చేస్తున్నా, జగనన్న తోడు లేనప్పుడు డైలీ ఫైనాన్స్‌ కింద వడ్డీలకు డబ్బు తెచ్చుకునే వాళ్ళం, వారి దగ్గర రూ. 10 వేలు తీసుకుంటే ముందే రూ. 3 వేలు కట్‌ చేసి ఇచ్చేవారు, ఆ డబ్బు ప్రతీ రోజూ రీ పేమెంట్‌ చేసే వాళ్ళం, ఇప్పుడు ఆ సమస్యలన్నీ మీరు తీర్చారు అన్నా, కరోనా కష్టకాలంలో కూడా మీరు వలంటీర్‌ను ఇంటికే పంపి అందజేస్తున్నారు. మీరు అధిక వడ్డీల నుంచి మమ్మల్ని బయట పడేశారు, నాకు ఇద్దరు పిల్లలు, నాన్న గారు పావలా వడ్డీ ఇస్తే మీరు సున్నా వడ్డీకే ఇచ్చారు, చాలా సంతోషం. మా సచివాలయంలో మేం ఏం కావాలన్నా అన్నీ తెలుసుకుని తీసుకుంటున్నాం, ఒకటో తేదీ సూర్యోదయం అయినా లేట్‌ అవుతుందేమో కానీ మీరు మాత్రం పెన్షన్‌ లేట్‌ చేయకుండా ఇస్తున్నారు. నాకు ఈ మధ్యే ఇళ్ళ స్ధలం వచ్చింది, ఈ కష్టకాలంలో కూడా మాకు ఏ లోటూ లేకుండా అందుతున్నాయి. ఒక మంచి సంకల్పంతో మీరు పనిచేస్తున్నారు అన్నా, నాకు ఆసరా డబ్బు అందింది, నాకు ఒక్క ఏడాదిలోనే రూ. 84,100 ఆదాయం వచ్చింది. ఏ ప్రభుత్వంలో ఇంత లబ్ది జరగలేదు, కోటి మంది మహిళల తరపున మీకు ధన్యవాదాలు అన్నా, మీరు తండ్రిని మించిన తనయుడు అనిపించుకున్నారు, మీరు ఆయురారోగ్యాలతో ఉండాలని మా దీవెనలు ఎప్పటికీ మీకు ఉంటాయన్నా...ధన్యవాదాలు

*హైమావతి, లబ్దిదారు, కమలాపురం, వైయస్సార్‌ కడప జిల్లా*

అన్నా మీరు సీఎంగా రెండేళ్ళు పూర్తిచేసుకున్నందుకు మా ఆడపడుచుల తరపున శుభాకాంక్షలు తెలియజేస్తున్నాను. నేను గత ఐదేళ్ళుగా ఫ్యాన్సీ ఐటమ్స్‌ అమ్ముతున్నాను, పెట్టుబడి కోసం గతంలో ఇబ్బందులు పడేవాళ్ళం, అధిక వడ్డీలకు డబ్బు తెచ్చుకునేవాళ్ళం, కానీ మాకు ఈ కష్టకాలంలో మీరు నేనున్నాను అనే భరోసా ఇచ్చారు. మాకు మీరు తోడుగా నిలిచారు, మీరు వచ్చిన తర్వాతే సకాలంలో వర్షాలు పడుతున్నాయి, రైతులు బావున్నారు, ప్రజలు బావున్నారు. గత ప్రభుత్వంలో చంద్రబాబు ఇచ్చిన మాట నిలుపుకోలేదు, చాలా ఇబ్బందులు పడ్డాం, కానీ ఇప్పుడు అందరం సంతోషంగా ఉన్నాం. నాకు ఇద్దరు పిల్లలు, పిల్లలు బాగా చదువుకుంటామంటున్నారు, వారిని బాగా చదివించుకుంటాను, మేం మీ పాలనలో తల ఎత్తుకు తిరుగుతాం. మీరు చిరకాలం ముఖ్యమంత్రిగా ఉండాలి, మీరు మనసున్న మారాజు, మా అందరి ఆయుష్షు పోసుకుని చిరకాలం ఆయురారోగ్యాలతో ఉండాలన్నా...

*సరళాదేవి, లబ్దిదారు, తాడికొండ, గుంటూరు జిల్లా*

జగనన్నా కరోనా కష్టకాలంలో మీరు అందరినీ ఆదుకుంటున్నారు. తోపుడు బండ్ల మీద వ్యాపారాలు చేసుకునే చిరువ్యాపారులకు సాయం చేస్తున్న మొదటి వ్యక్తి మీరే. వలంటీర్‌ వచ్చి ఈ సాయం చేస్తున్నట్లు చెబితే సంతోషపడ్డాం, మేం వడ్డీ వ్యాపారులకు భయపడి ఏం చేయాలో దిక్కుతోచని పరిస్ధితుల్లో ఉన్న సమయంలో మీరు ఆదుకున్నారు. మీరు ఇళ్లస్ధలాలు ఇచ్చారు, మా పిల్లలు కూడా చాలా సంతోషంగా ఉన్నారు, ఆరోగ్యశ్రీ కింద ఆపరేషన్‌ చేసిన తర్వాత కూడా మళ్ళీ డబ్బు ఇచ్చారు, మీకు ఎప్పటికీ రుణపడి ఉంటామన్నా. మీరు చల్లగా నిండు నూరేళ్ళు ఉండాలన్నా.