గుడివాడ పట్టణాన్ని వ్యభిచారానికి అడ్డాగా మార్చిన "డేవిడ్ భాయ్"

 *- గుడివాడ పట్టణాన్ని వ్యభిచారానికి అడ్డాగా మార్చిన "డేవిడ్ భాయ్"* 

 *- ఓవర్ బ్రిడ్జి సెంటర్లోని లాడ్జిలో బహిరంగంగానే కార్యకలాపాలు*

*- వాట్సాప్ లోనూ అమ్మాయిల ఫోటోలతో విటులకు ఎర*

 *- నెలకు రూ. లక్షల్లో పాత నేరస్తుడి నుండి మామూళ్లు*

 *- ప్రతి ఆదివారం రెండు గొర్రెల మాంసం డోర్ డెలివరీ*

 *- కృష్ణా, ఎన్టీఆర్, గుంటూరు జిల్లాల నుండి మహిళలు*

 *- తెల్లవారుజాము 4గంటల నుండి విటులతో బిజీ బిజీగా లాడ్జి*

*- రెగ్యులర్ కస్టమర్స్ కోరితే కారులోనూ పంపే ఏర్పాటు*

 *- రాత్రి 11గంటల తర్వాత ఆర్టీసీ కాలనీలోని బిల్డింగ్ లో "రిలాక్స్"*

 *- మహిళల రిలాక్స్ కోసం రూ.32 లక్షలతో బిల్డింగ్ కొనుగోలు* 

 *- సీసీ కెమెరాలతో పాటు 12 మందితో 24/7 నిఘా*

 *- "స్టేషన్ రైటర్" తీగ లాగితే డేవిడ్ భాయ్ కధ ముగిసినట్టే*

గుడివాడ, జనవరి 17 (ప్రజా అమరావతి): గుడుల వాడగా పేరుగాంచిన కృష్ణాజిల్లాలోని గుడివాడ పట్టణాన్ని "డేవిడ్ భాయ్" వ్యభిచారానికి అడ్డాగా మార్చేశాడు. స్థానిక ఓవర్ బ్రిడ్జి సెంటర్లో ఏకంగా ఒక లాడ్జిని అద్దెకు తీసుకున్న ఈ పాత నేరస్థుడు డేవిడ్ భాయ్ ఎంతో రిలాక్స్డ్ గా, బహిరంగంగా తన వ్యభిచార కార్యకలాపాలను నిర్వహించుకుపోతున్నాడు. అసలు ఈ డేవిడ్ భాయ్ అంటే గుడివాడ ప్రాంతంలో తెలియని వారుండరు. గుడివాడ రైల్వే స్టేషన్ రోడ్ లో కొంతకాలం క్రితం వరకు వ్యభిచారం నడిచిన లాడ్జి పేరు చెబితే ఈ డేవిడ్ భాయ్ ఠక్కున గుర్తుకొచ్చేస్తారు. ఇప్పటికే రెండుసార్లు పోలీసులు డేవిడ్ భాయ్ వ్యభిచారం చేయించిన లాడ్జ్ కి సీళ్లు వేశారంటే పరిస్థితిని అర్థం చేసుకోవచ్చు. చివరిసారిగా వేసిన సీలును పోలీసులు ఇంకా తెరవకపోవడంతో చేసేదిలేక ఓవర్ బ్రిడ్జి సెంటర్లోని ఒక లాడ్జిలో వ్యభిచార దుకాణం తెరిచేశాడు. గతంలో ఈ లాడ్జి పక్కనే ఒక బార్ అండ్ రెస్టారెంట్ ఉండేది. మద్యం 24 గంటలూ అందుబాటులో ఉండడంతో అప్పట్లో ఈ లాడ్జికి డిమాండ్ కొనసాగింది. ఆ తర్వాత బార్ అండ్ రెస్టారెంట్  వేరే ప్రాంతానికి షిఫ్ట్ అయిపోయింది. దీంతో ఈ లాడ్జికి కస్టమర్లు కూడా ఒక్కసారిగా తగ్గిపోయారు. గుడివాడ రైల్వే స్టేషన్ రోడ్ లోని లాడ్జి మూతపడిన వేళ ఓవర్ బ్రిడ్జి సెంటర్లోని కస్టమర్లు తగ్గిన లాడ్జి డేవిడ్ భాయ్ కంటపడింది. పోలీసుల సహకారం ఉంటే ఎక్కడైనా వ్యభిచారం నిర్వహించుకోవచ్చనే ఆలోచనతో పట్టణంలోని ఒక పోలీస్ స్టేషన్ రైటర్ తీగ కదిపాడు. అక్కడినుండి డేవిడ్ భాయ్ రిలాక్స్డ్ గా, బహిరంగంగా, విచ్చలవీడిగా, 24/7 వ్యభిచారం నిర్వహించుకునేందుకు అనుమతులు వచ్చి పడ్డాయి. నెలకు రూ. లక్షల్లో మామూళ్లు, ప్రతి ఆదివారం రెండు గొర్రెల మాంసం డోర్ డెలివరీ వంటి ఒప్పందాలు కుదిరేశాయి. వెంటనే కృష్ణా, ఎన్టీఆర్, గుంటూరు జిల్లాల నుండి వ్యభిచారం చేసే మహిళలను డేవిడ్ భాయ్ గుడివాడ పట్టణానికి దించేసాడు. మహిళలను బ్యాచ్ లవారిగా విభజించి లాడ్జికి తరలిస్తూ వ్యభిచారం చేయిస్తున్నాడు. రోజూ వందల సంఖ్యలో విటులు ఈ లాడ్జ్ కి పోటెత్తుతున్నారు.

ప్రతిరోజు తెల్లవారుజాము నాలుగు గంటల నుండి విటులతో లాడ్జ్ బిజీబిజీగా కనిపిస్తుంది. రాత్రి 11 గంటల తర్వాత లాడ్జ్ కి ఫ్యామిలీలు వచ్చి వెళుతున్నట్టుగా కలర్ ఇస్తుంటారు. డేవిడ్ భాయ్ నియమించుకున్న 12 మంది తమ స్కూటర్లు, బైక్ లపై వ్యభిచారం చేసే మహిళలను లాడ్జ్ నుండి గుడివాడ పట్టణం పామర్రు రోడ్డులోని ఆర్టీసీ కాలనీలో నూతనంగా కొనుగోలు చేసిన బిల్డింగ్ లోకి తరలిస్తుంటారు. ఈ బిల్డింగ్ ను డేవిడ్ భాయ్ ఇటీవల రూ. 32 లక్షలకు కొనుగోలు చేశాడు. వ్యభిచారం చేస్తున్న మహిళలు బ్యాచ్ ల వారీగా రిలాక్స్ అయ్యేందుకు బిల్డింగ్ ను అంత పెద్ద మొత్తానికి కొనుగోలు చేసినట్టుగా తెలుస్తోంది. వ్యభిచారం నిర్వహించే లాడ్జిలో సీసీ కెమెరాల పర్యవేక్షణ కూడా ఉంది. వీటితోపాటు డేవిడ్ భాయ్ ప్రత్యేకంగా నియమించుకున్న 12 మంది వ్యక్తులు కూడా 24/7 పర్యవేక్షిస్తుంటారు. ఏమైనా అనుమానం వస్తే వెంటనే సమాచారాన్ని డేవిడ్ భాయ్ కు, అవసరమైతే అక్కడినుండి పోలీస్ స్టేషన్ కు చేరవేస్తుంటారు. అలా డేవిడ్ భాయ్ తన వ్యభిచార కార్యకలాపాలను నిర్వహించుకునేందుకు ఎవరు ఏది అడిగినా సమర్పించుకునేందుకు సిద్ధంగా ఉంటాడు. డేవిడ్ భాయ్ లో ఉన్న ఈ ఒక్క అంశమే పోలీస్ స్టేషన్ తో పాటు పలువురు ఉన్నతాధికారులను కూడా మెప్పించిందని చెబుతుంటారు.

డేవిడ్ భాయ్ తన వ్యభిచార కార్యకలాపాలను లాడ్జికి మాత్రమే పరిమితం చేయకుండా విస్తరించుకుంటూ పోతున్నాడు. విటులను ఆకర్షించేందుకు వాట్సాప్ సౌకర్యాన్ని కూడా వినియోగించుకుంటున్నాడు. తన మొబైల్లో వున్న కస్టమర్లకు వాట్సాప్ ద్వారా అమ్మాయిల ఫోటోలను పంపుతూ ఉంటాడు. నచ్చినవారిని కోరిన చోటకు పంపడం డేవిడ్ భాయ్ ప్రత్యేకతగా చెబుతుంటారు. రెగ్యులర్ కస్టమర్ల సౌకర్యార్థం వారు కారు పంపితే ఎక్కడికైనా అమ్మాయిలను పంపేందుకు డేవిడ్ భాయ్ ముందుంటాడు. ఎన్నో ఏళ్ల కిందట వ్యభిచారంలో గుడివాడ పట్టణానికి రాష్ట్రస్థాయిలో ఎంతో కీర్తి ప్రతిష్టలు ఉండేవి. రాష్ట్ర నలుమూలల నుండి గుడివాడకు వచ్చే విటులు తప్పనిసరిగా పాటిమీద ఉన్న వ్యభిచార కేంద్రాన్ని దర్శించుకుని వెళ్లేవారు. గుడివాడలో మూడవ తిరుపతిగా పేరుగాంచిన శ్రీ వెంకటేశ్వర స్వామి దేవస్థానం పక్కనే ఈ వ్యభిచార కేంద్రం చాలా కాలం నడిచింది. ఇక్కడ వందలాదిమంది మహిళలు వ్యభిచారాన్ని వృత్తిగా ఎంచుకొని జీవనం సాగించారు. కొద్ది సంవత్సరాల క్రితం పోలీసులకు ఏమైందో తెలియదు గానీ గుడివాడకు అడ్డాగా ఉన్న వ్యభిచార కేంద్రాలను శాశ్వతంగా మూసి వేయించారు. ఇలా మూసి వేయించిన సంఘటన గుడివాడ చరిత్రలోనే సువర్ణ అక్షరాలతో లిఖింపదగ్గ విషయంగా నేటికీ చెప్పకుంటుంటారు. ఆ తర్వాత వ్యభిచార కేంద్ర నిర్వాహకులు కూడా వేర్వేరు వ్యాపారాల్లో స్థిరపడిపోయారు. ప్రస్తుతం డేవిడ్ భాయ్ మాత్రం అప్పట్లో గుడివాడకు ఉన్న పాత పేరును పునరుద్ధరించే పనిలో నిమగ్నమై ఉన్నట్టుగా తెలుస్తోంది. దీనిలో భాగంగానే డబ్బును రూ. కోట్లలో సంపాదిస్తూ, రూ. లక్షలను మామూళ్లుగా ఎరవేస్తూ తన వ్యభిచార సామ్రాజ్యాన్ని విస్తరించుకుంటూ పోతున్నాడు. ఇప్పటికే గుడివాడ పట్టణానికి మూడు జిల్లాల నుండి వ్యభిచారం చేసే మహిళలు విడతల వారీగా వచ్చి వెళ్తున్నారు. డేవిడ్ భాయ్ కూడా సంపాదించుకుంటున్న డబ్బుతో ఎక్కడబడితే అక్కడ బిల్డింగ్ లను కొనుగోలు చేస్తూ వస్తున్నాడు. డేవిడ్ భాయ్ ను ఇప్పటికిప్పుడు అదుపు చేయలేదంటే కొద్దికాలంలోనే అతను మరికొన్ని ప్రాంతాలకు వ్యభిచార కార్యకలాపాలను విస్తరించే ప్రమాదం ఉందని పలువురు ఆందోళన చెందుతున్నారు. సింపుల్ గా చెప్పాలంటే ఆ పోలీస్ స్టేషన్ రైటర్ తీగలాగితే డేవిడ్ భాయ్ కధ ముగిసినట్టేనని పలువురు పట్టణ ప్రజలు వ్యాఖ్యానిస్తున్నారు. మరి పోలీసు ఉన్నతాధికారులు ఇప్పటికైనా స్పందించి డేవిడ్ భాయ్ వ్యభిచార కార్యకలాపాల ఆటను కట్టిస్తారో లేదో చూడాలి.