రాష్ట్రంలో క్రీడా అభివృద్ధికి నూతన రథసారథులు.
*అట్టహాసంగా ఆంధ్రప్రదేశ్ క్రీడా ప్రాధికార సంస్థ డైరెక్టర్ ల ప్రమాణ స్వీకార మహోత్సవం* 

 *రాష్ట్రంలో క్రీడా అభివృద్ధికి నూతన రథసారథులు*

 

 *మంత్రి సమక్షంలో శాప్ పాలకమండలి సభ్యుల ప్రమాణ స్వీకారం* 

విజయవాడ, జూన్ 27 (ప్రజా అమరావతి):
విజయవాడ తుమ్మలపల్లి కళాక్షేత్రంలో ఆంధ్రప్రదేశ్ క్రీడా ప్రాధికార సంస్థ (శాప్) డైరెక్టర్ల ప్రమాణ స్వీకార మహోత్సవం అట్టహాసంగా జరిగింది. ఈ కార్యక్రమానికి రాష్ట్ర రవాణా, యువజన క్రీడా శాఖ మంత్రి మండిపల్లి రాంప్రసాద్ రెడ్డి గారు ముఖ్య అతిథిగా హాజరై, నూతనంగా నియమితులైన డైరెక్టర్ల చేత ప్రమాణ స్వీకారం చేయించారు.

 ఈ సందర్భంగా ఎంపీ కేశినేని చిన్ని  మాట్లాడుతూ, "రాష్ట్రంలో క్రీడా అభివృద్ధి, యువత లో ఉన్న క్రీడా ప్రతిభను వెలికితీయడం, శారీరకంగా దృఢమైన సమాజ నిర్మాణం మన ప్రభుత్వ ప్రధాన లక్ష్యం" అని పేర్కొన్నారు. గతంలో ముఖ్యమంత్రి నారా చంద్రబాబు నాయుడు గారి విజన్‌లో భాగంగా 2014–2019 మధ్య ఖరారు చేసిన ప్రణాళికల ద్వారా ఆంధ్రప్రదేశ్ క్రీడారంగానికి పునాదులు పడ్డాయని, అదే మార్గంలో నేటి ప్రభుత్వం ముందడుగు వేస్తోందని పేర్కొన్నారు. 

మంత్రి నారా లోకేష్ గారి నేతృత్వంలో రాష్ట్రానికి అవసరమైన గేమ్ ప్రాజెక్టులకు కేంద్రాన్ని అభ్యర్థించిన విషయాన్ని గుర్తు చేస్తూ, శాప్  ఆంధ్ర క్రికెట్ అసోసియేషన్ కలసి గ్రామీణ స్థాయిలో క్రీడలను ప్రోత్సహించేందుకు చర్యలు చేపడతామని తెలిపారు. ప్రతి జిల్లాలో క్రికెట్ స్టేడియంలు నిర్మించేందుకు కృషి జరుగుతోందని, విద్యార్థులకు పాఠశాల స్థాయిలోనే క్రీడా మౌలిక సదుపాయాలను కల్పించడమే లక్ష్యమని మంత్రి రాంప్రసాద్ తెలిపారు. 

ప్రమాణ స్వీకార చేసిన డైరెక్టర్లు:
ఈ. రాజని, ఎ. రమణారావు, ఎం.డి. రమేశ్ కుమార్, పేరం రవీంద్రనాథ్, ఎస్. సంతోష్ కుమార్, కె. జగదేశ్వరి, బి. శివ, పి.బి.వి.ఎస్.ఎన్. రాజు (బుచ్చిరాజు).

ఈ కార్యక్రమానికి శాప్ చైర్మన్ అనిమిని రవి నాయుడు, విజయవాడ ఎంపీ కేశినేని చిన్ని, ఎమ్మెల్యే నక్కా ఆనందబాబు, పలు కార్పొరేషన్ చైర్మన్లు హాజరై, నూతన డైరెక్టర్లకు అభినందనలు తెలిపారు.
శాప్ చైర్మన్ అనిమిని రవినాయుడు  మాట్లాడుతూ, "క్రీడల్లో రాజకీయాలకు స్థానం లేదు. అభివృద్ధే లక్ష్యం. ప్రతి డైరెక్టర్ సమర్థంగా పనిచేసి యువత భవిష్యత్తు తీర్చిదిద్దే దిశగా కృషి చేయాలి" అని సూచించారు.
Comments