ముఖ్యమంత్రిని కలిసిన ఎన్నారై వైద్య బృందం – రాష్ట్ర వైద్య రంగంలో తమ వంతు సహకారం.

తాడేపల్లి (ప్రజా అమరావతి);

*గౌరవ ముఖ్యమంత్రిని కలిసిన ఎన్నారై వైద్య బృందం – రాష్ట్ర వైద్య రంగంలో తమ వంతు సహకారం*

ప్రజారోగ్యానికి పెద్దపీట పీట వేస్తూ, ఆరోగ్యాంధ్రప్రదేశ్ లక్ష్యంగా వైద్యరంగంలో విప్లవాత్మక సంస్కరణలు చేపడుతున్న రాష్ట్ర ప్రభుత్వానికి సహకారం అందించేందుకు ప్రవాస వైద్యులు ముందుకొచ్చారు. నిన్న (12.08.22) తాడేపల్లి లోని సీయం క్యాంపు కార్యాలయంలో గౌరవ ముఖ్యమంత్రి శ్రీ వై.ఎస్. జగన్ మోహన్ రెడ్డి గారిని కలిసి విలేజ్ క్లీనిక్, టెలి మెడిసిన్ మరియు ఇతర ఆరోగ్య శిక్షణా కార్యక్రమాలలో పాలు పంచుకునేందుకు ఆసక్తి చూపించారు. 

అమెరికన్ అసోసియేషన్ ఆఫ్ ఫిజీషియన్స్ ఆఫ్ ఇండియన్ ఆరిజిన్ (AAPI) అధ్యక్షుడు డాక్టర్ రవి కొల్లి ఆధ్వర్యంలో జనవరి 6-8, 2023 వరకు విశాఖపట్నంలో నిర్వహించనున్న 16వ వార్షిక AAPI గ్లోబల్ హెల్త్‌కేర్ సమ్మిట్ (GHS)లో పాల్గొనవలసిందిగా గౌరవ సిఎం గారిని ఆహ్వానించారు.  మధుమేహం, హృదయ సంబంధ వ్యాధులు, స్త్రీలు & పిల్లల ఆరోగ్యం, అంటు వ్యాధులు మరియు మానసిక ఆరోగ్యం వంటి కీలకమైన ఆరోగ్య అంశాలపై  అవగాహన పెంచడం ఈ సమ్మిట్ లక్ష్యమని డాక్టర్ రవి కొల్లి ముఖ్యమంత్రి గారికి వివరించారు.  ఆంధ్రప్రదేశ్ రాష్ట్ర అభివృద్ధిలో ముఖ్యంగా ఆరోగ్య సంరక్షణ రంగాలలో ఏపీని మోడల్ రాష్ట్రంగా మార్చడానికి AAPI వైద్యులు   సిఎం గారి పరిపాలనలో పని చేయడానికి ఆసక్తిని కనబరుస్తున్నారని డాక్టర్ రవి వ్యక్తం చేశారు. టెలి కన్సల్టేషన్‌లు, ట్రైనర్ సెషన్‌లకు శిక్షణ ఇవ్వడం, వివిధ ప్రత్యేకతల కోసం నేర్చుకునే మాడ్యూల్స్ మొదలైన వాటికి AAPI మద్దతు ఇస్తుందని డా. రవి తెలిపారు.

మాతా శిశు మరణాలను తగ్గించే  దిశగా రాష్ట్ర ప్రభుత్వంతో కలిసి పనిచేసేందుకు  అమెరికాకు చెందిన  ట్రైన్ అండ్ హెల్ప్ ఏ బేబీ సంస్థ (TAHB) తమ సంసిద్ధతను తెలిపింది. TAHB సంస్థ వ్యవస్థాపకులు మరియు అధ్యక్షులు డాక్టర్ కె. ప్రకాష్ సంస్థ లక్ష్యాల గురించి సీయం గారికి వివరించారు. బోధనా సంస్థలు, ప్రాథమిక ఆరోగ్య కేంద్రాలు మొదలైన వాటితో TAHB పని చేస్తుందన్నారు.

గౌరవ ముఖ్యమంత్రి గారితో సమావేశం ఏర్పాటు చేసినందుకు ఎన్నారై వైద్య బృందం... రాష్ట్ర ప్రభుత్వ సలహాదారు – ప్రవాసాంధ్రుల వ్యవహారాలు మరియు APNRTS అధ్యక్షులు శ్రీ వెంకట్ ఎస్. మేడపాటి గారికి కృతజ్ఞతలు తెలిపారు. 

విలేజ్ క్లినిక్‌లు, ప్రాథమిక ఆరోగ్య కేంద్రాలు, మిడ్ లెవెల్ హెల్త్ ప్రొవైడర్లకు శిక్షణ అందించడంలో ఎన్నారై వైద్యులు, సంఘాలు సహకారం అందించడానికి ముందుకు రావడాన్ని  గౌరవ సీయం అభినందించారు. అలాగే,  AAPI వారు చెప్పిన మానసిక ఆరోగ్య కార్యక్రమం పట్ల ఆసక్తిని కనబరిచారు మరియు అవసరమైన సమయంలో ఉపయోగపడే మానసిక ప్రథమ చికిత్సలో శిక్షణ పొందగల కౌన్సెలర్‌లను పాఠశాలలకు కేటాయించాలని అభిప్రాయపడ్డారు. గ్రాస్ రూట్ స్థాయిలో నైపుణ్యాలను మెరుగుపరచడానికి 15,000 మందికి పైగా ఆశా  కార్యకర్తలకు వర్చువల్ సెషన్‌ల ద్వారా దృష్టి సారించవచ్చని గౌరవ ముఖ్యమంత్రి గారు సూచించారు. 

ఆరోగ్య సంరక్షణలో  తనకు రాష్ట్ర ప్రభుత్వం తరఫున ఎన్నారై వైద్య వ్యవహారాల సలహాదారుగా అవకాశం కల్పించినందుకు గౌరవనీయులైన సిఎం గారికి డాక్టర్ ఎన్. వాసుదేవ రెడ్డి కృతజ్ఞతలు తెలిపారు. ఫ్యామిలీ డాక్టర్ కాన్సెప్ట్‌లో ఉపయోగపడే పోస్ట్ గ్రాడ్యుయేట్ ప్రోగ్రామ్‌ను ఏపీలోని అన్ని మెడికల్ కాలేజీల్లో ఫ్యామిలీ మెడిసిన్‌ చేర్చాలని సీఎం గారికి ప్రతిపాదించారు.  రాష్ట్రంలో  ఆరోగ్య సంరక్షణను మెరుగుపరచడానికి APNRTS, AAPI, TAHB, లయన్స్ క్లబ్, రోటరీ క్లబ్ మొదలైన వాటితో సమన్వయం చేస్తానని పేర్కొన్నారు.

అదే విధంగా ఎన్నారై డాక్టర్లు రాష్ట్ర ఆరోగ్య శాఖమంత్రి శ్రీమతి విడదల రజిని గారిని,  స్పెషల్ సెక్రటరీ హెల్త్, మెడికల్ అండ్ ఫ్యామిలీ వెల్ఫేర్ శ్రీ నవీన్ కుమార్ IAS., గారిని కలిసి తమ ఆలోచనలను తెలిపారు. అనంతరం మంత్రి గారు అవసరమైన  సహాయ సహకారాలు అందిస్తామని అన్నారు.

ఈ సమావేశంలో TAHB డైరెక్టర్ శ్రీ  హరి బాబు సింగం, డాక్టర్ సుమన నంజుండాచార్, డాక్టర్ జనార్దన్, పిటి జగన్నాథ రావు మరియు శ్రీ రామ్ గోపాల్, ఎన్ఆర్ఐ వైద్యుల బృందం  తదితరులు ఉన్నారు.