యువత దేశ నిర్మాణానికి సహకరించాలి - రామ్మోహన్ నాయుడు.

రోజ్‌గార్ మేళాను ఉద్దేశించి ప్రసంగించిన  ప్రధాని శ్రీ నరేంద్ర మోడీ

యువత దేశ నిర్మాణంలో చురుకుగా పాల్గొన్నప్పుడు, దేశం వేగవంతమైన అభివృద్ధిని అనుభవిస్తుంది మరియు ప్రపంచ వేదికపై గుర్తింపు పొందుతుంది: ప్రధానమంత్రి

278 నియామక పత్రాలను విశాఖపట్నంలో 15వ రోజ్‌గార్ మేళాలో పంపిణీ చేసిన కేంద్ర పౌర విమానయాన మంత్రి రామ్మోహన్ నాయుడు 

యువత దేశ నిర్మాణానికి సహకరించాలి

-  రామ్మోహన్ నాయుడు

విశాఖపట్నం

26 ఏప్రిల్, 2025 (ప్రజా అమరావతి),

ప్రధానమంత్రి శ్రీ నరేంద్ర మోదీ రోజ్‌గార్ మేళాలో  వీడియో కాన్ఫరెన్సింగ్ ద్వారా వివిధ ప్రభుత్వ విభాగాలు మరియు సంస్థలలో కొత్తగా నియమితులైన  51,000 కి పైగా యువతకు నియామక లేఖలను పంపిణీ చేశారు. ఈ సమావేశాన్ని ఉద్దేశించి ఆయన ప్రసంగిస్తూ, భారత ప్రభుత్వంలోని వివిధ విభాగాలలో ఈ యువతకు కొత్త బాధ్యతలు ప్రారంభమవుతాయని ఆయన నొక్కి చెప్పారు. దేశ ఆర్థిక వ్యవస్థను, అంతర్గత భద్రతను బలోపేతం చేయడం, ఆధునిక మౌలిక సదుపాయాల నిర్మాణానికి దోహదపడటం మరియు కార్మికుల జీవితాల్లో పరివర్తనాత్మక మార్పులు తీసుకురావడం వారి విధుల్లో భాగమని ఆయన వ్యాఖ్యానించారు. తమ బాధ్యతలను నిజాయితీగా నిర్వర్తిస్తే  భారతదేశం అభివృద్ధి చెందిన దేశంగా మారే ప్రయాణంపై సానుకూల ప్రభావాన్ని చూపుతుందని ప్రధానమంత్రి చెప్పారు. యువత తమ విధులను అత్యంత అంకితభావంతో నిర్వహిస్తారని ఆయన విశ్వాసాన్ని వ్యక్తం చేశారు. యువత సహాయంతో భారతదేశం ప్రపంచంలో డిజిటల్ ఎకానమీ సూపర్ పవర్‌గా అవతరించిందని ఆయన అన్నారు. 

 దేశంలోని 47 వేర్వేరు ప్రాంతాలలో 15వ రోజ్‌గార్ మేళాను నిర్వహించారు. మొత్తం 51236 మంది కొత్తగా నియామకం పొందగా, విశాఖపట్నంలో 278 మంది అభ్యర్థులకు కేంద్ర పౌర విమానయాన మంత్రి రామ్మోహన్ నాయుడు నియామక పత్రాలను అందజేశారు. దేశ నిర్మాణంలో తోడ్పడాలని భారత ప్రభుత్వపు వివిధ విభాగాలలో మరియు బ్యాంకింగ్ రంగంలో కొత్తగా  నియామకాలు తీసుకున్నవారికి విజ్ఞప్తి చేశారు. శ్రీ రామ్మోహన్ నాయుడు మాట్లాడుతూ, కలల ఉద్యోగాలను సాధించే ప్రక్రియలో యువత ఎన్నో ఆనందాలను త్యాగం చేస్తారని అన్నారు. అయితే, ప్రభుత్వ సేవ మరియు జీవితపు కొత్త ప్రయాణంలో పెద్ద లక్ష్యాలను సాధించడానికి అదే ఉత్సాహంతో పనిచేయాలని ఆయన వారిని కోరారు. యువతకు మరియు సమాజానికి ఆదర్శంగా ఉండాలని వారికి విజ్ఞప్తి చేశారు.

ఉత్త రాంధ్రలోని వెనుకబడిన జిల్లాల అభ్యర్థులనుద్దేశించి కేంద్ర మంత్రి మాట్లాడుతూ, తమను ఉన్నత స్థాయికి తెచ్చిన తమ సమాజ అభివృద్ధికి తోడ్పడాల్సిన సమయం ఆసన్నమైందని అన్నారు. ఉత్తరాంధ్రలో అభివృద్ధి చెందడానికి అన్ని వనరులు మరియు అవకాశాలు ఉన్నాయని ఆయన అన్నారు.  ఈ ప్రాంత సమస్యలు వాటి పరిష్కారాల పట్ల బాగా ఇక్కడి యువతకు అవగాహన ఉందని శ్రీ రామ్మోహన్ నాయుడు విశ్వాసం వ్యక్తం చేశారు.

నియామక పత్రాల పంపిణీ అనంతరం మీడియాతో మాట్లాడిన కేంద్ర మంత్రి రామ్మోహన్ నాయుడు, వికసిత్ భారత్ నిర్మాణంలో యువతను భాగం చేయడం ప్రధానమంత్రి నరేంద్ర మోడీ దార్శనిక చొరవ అని అన్నారు. దేశ నిర్మాణంలో యువత శక్తిని మరియు వారి వినూత్న ఆలోచనలను సమలేఖనం చేయడానికి అన్ని ప్రయత్నాలు జరుగుతున్నాయని ఆయన అన్నారు. ఆశావహులైన యువతను ప్రోత్సహించడానికి ఉద్యోగాల ప్రకటనకు నియామక లేఖల పంపిణీకి మధ్య ప్రక్రియను ఒక సంవత్సరానికి తగ్గించామని చెప్పారు.  రోజ్‌గార్ మేళాలు ప్రారంభమైనప్పటి నుండి 10 లక్షలకు పైగా యువతకు నియామక లేఖలు అందాయని ఆయన తెలియజేశారు.

దేశవ్యాప్తంగా 47 రోజ్‌గార్ మేళా కేంద్రాల్లో రెవెన్యూ, సిబ్బంది మరియు ప్రజా ఫిర్యాదులు మరియు పెన్షన్లు, పోస్టల్, హోం వ్యవహారాలు, ఉన్నత విద్య, రైల్వేలు, కార్మిక - ఉపాధి మరియు బ్యాంకింగ్ వంటి విభాగాలలో వివిధ స్థాయిలలో అధికారులకు నియామక లేఖలను ప్రధానమంత్రి నరేంద్ర మోదీ ఈరోజు విడుదల చేశారు. డీఓపీటీ మంత్రి డాక్టర్ జితేంద్ర సింగ్ స్వాగత ప్రసంగం చేశారు.

కస్టమ్స్ & జిఎస్‌టి జోన్ చీఫ్ కమిషనర్ శ్రీ సంజయ్ రాఠీ , విశాఖపట్నంలోని కస్టమ్స్ ప్రిన్సిపల్ కమిషనర్ శ్రీ ఎన్ శ్రీధర్, గుంటూరులోని సిజిఎస్‌టి ఆడిట్ కమిషనర్ శ్రీ పి ఆనంద్ కుమార్, విశాఖపట్నంలోని నేషనల్ అకాడమీ ఆఫ్ కస్టమ్స్, పరోక్ష పన్నులు & మాదకద్రవ్యాలు (నాసిన్) అదనపు డైరెక్టర్ జనరల్ శ్రీ ఈదర రవికుమార్ కూడా విశాఖపట్నంలో జరిగిన 15వ రోజ్‌గార్ మేళాలో పాల్గొన్నారు.